The Irish Traditional Music Archive (ITMA) is committed to providing free, universal access to the rich cultural tradition of Irish music, song and dance. If you’re able, we’d love for you to consider a donation. Any level of support will help us preserve and grow this tradition for future generations.
Níl ciall ‘Mo Chúranán’ soiléir ach chuile sheans gur focal muirneach é.
Scríobh Ennis go bhfuair Dinny an suantraí seo ó chailín ó Chontae Aontroma oíche amháin a raibh sí ag gabháil fhoinn i nGort an Choirce. Níor chuimhin leis a hainm ná a seoladh agus níor bhuail sé léi ach an t-aon uair amháin.
Dúirt Seán Ó hEochaidh le Ennis gur minic a chuala sé an fonn sin thiar i ndúthaigh Theileann, ach nárbh iad sin na focla a bhí leis, dúirt sé. Níor chuimhin leis cén t-amhrán a mbíodh sé leis.
Nóta le hathscríobh an cheoil:
Scríobh Ennis an méid seo a leanas os cionn nodaireacht an cheoil:
Ceolta Dhonnacha Uí Bhaoill as Leitir Catha, Clochán Liath, Tír Chonaill.
‘Mo Chúranán’ suantraí.
Go mall, rialta. Scríobh sé ‘ralle[n]tando’ [ag moilliú] le líne dheireanach an cheoil.
Thug sé cur síos ar an suantraí freisin: ‘Fuair Donnacha an suantraí seo ó bhean as Co. Aontroma, oíche dá rabhthas ag gabháil cheoil sa teach ósta i nGort an Choirce. Níor chuimhin leis a hainm ná a seoladh. Deir Seán Ó hEochaidh liom gur minic a chuala sé an fonn ceoil seo thiar i dTeileann, Tír Chonaill ach nárbh iad seo na focail a bhí leis. Níor chuimhin leis na focail, ámh. Tá an suantraí uilig scríofa agam ó Dhonncha.’
Mo Chúranán. (ó Dinny)
Ó’s mo chúranán, mo chúranán,
Mo chúranán ‘s mo phlúirín bheag,
Grá mo chroí a sheóidín tsíoda
Seachta mo chroí is mo chúranán.
Ó’s mo dhamhna bheag, mo dhamhna bheag, (foster-child = damhna)
Mo dhamhna bheag, an t-úcaire, (fuller, dyer)
Grá mo chroí a sheóidín tsíoda
Seachta mo chroí ‘s mo dhamhna bheag.
Ó’s m’aingeal thú, is m’aingeal thú,
Is m’aingeal thú is béi go deó
Grá mo chroí a sheóidín tsíoda
Seachta mo chroí is m’aingeal thú.
Ó chailín as Co. Aontroma a thóig Dinny an suantraighe seo thuas, oidhche dá rabh sí ag ceól i nGort a’ Choirce. Níor chuimhin leis a h-ainm ná a seóladh, mar níor casú dhó í ach an oidhche sin.
Deir Seán liom (Ó h-Eochaidh) gur minic a chuala sé an fonn seo thiar i ndúthaigh Theileann, ach ní h-iad seo na foclaí a bhí leis, deir sé.
Ní cuimhin leis, ámh, cé’n t-amhrán a mbíodh sé leis.
Nóta le hathscríobh an cheoil:
Scríobh Ennis an méid seo a leanas os cionn nodaireacht an cheoil:
Ceolta Dhonnchadha Uí Bhaoighill as Leitir Chatha, Clochán Liath, Tír Chonaill.
‘Mo Chúranán’ suantraighe.
Go mall, rialta. Scríobh sé ‘ralle[n]tando’ [ag moilliú] le líne dheireanach an cheoil.
Thug sé cur síos ar an suantraí freisin: ‘Fuair Donncha an suantraighe seo ó bhean as Co. Aontroma, oidhche dá rabhthas ag guil cheoil sa teach ósta i nGort a’Choirce. Níor chuimhin leis a h-ainm ná a seóladh. Deir Seán Ó h-Eochaidh liom gur minic a chuala sé an fonn ceóil seo thiar i dTeileann, Tír Chonaill ach nárbh’ iad seo na focail a bhí leis. Níor chuimhin leis na focail, ámh. Tá an suantraighe uilig scríobtha agam ó Dhonnacha.
![Lillis Ó Laoire / [grianghrafadóir gan aithint]](https://s3.eu-west-1.amazonaws.com/images.itma.ie/seamusennis/255059_lillis_o_laoire.jpg "Lillis Ó Laoire / [grianghrafadóir gan aithint]")
![Donncha Ó Baoill ; Séamus Ennis / [grianghrafadóir gan aithint], Dún na nGall, c. 1944. Íomha le buíochas ó Tomás Ó Baoill](https://s3.eu-west-1.amazonaws.com/images.itma.ie/seamusennis/277669_donncha_obaoill_seamus_ennis.jpg "Donncha Ó Baoill ; Séamus Ennis / [grianghrafadóir gan aithint], Dún na nGall, c. 1944. Íomha le buíochas ó Tomás Ó Baoill")