Meán Fómhair 1943 a thug Ennis a chéad chuairt ar Frank Cassidy. Ón gcéad chuairt seo bhí ard-mheas ag Ennis ar fhidléireacht Frank agus scríobh sé ina dhialann an 17 Meán Fómhair 1943: ‘da mbeadh sé ag ceol as seo go deireadh na seachtaine, cos ní chorróinn amach as an gcistineach sin go dtí sin’. Ní raibh aon ainm ag Ennis don phort seo ach i nDún na nGall tugtar ‘Australian waters’ air, port a shamhlaítear go mór le fidléireacht Jimmy Lyons (1903-1977), a bhí ar chomhaimsir le Frank Cassidy agus lena cholceathrar, an fidléir Con Cassidy ó Theileann. Bhí cáil mar fhidléir binn ar Jimmy Lyons agus d’fhoghlaim seisean cuid mhór dá chuid ceoil ó phortaireacht bhéil a athar, John, a bhí mar fhoinse ag Frank freisin do chuid mhór dá chuid ceoil.